BUDADDIYAR WASIKA ZUWA GA SHUGABA MUHAMMADU BUHARI

BUDADDIYAR WASIKA ZUWA GA SHUGABA MUHAMMADU BUHARI

DAGA

MUDASSIR ALIYU YUNUSA

mudassiray@gmail.com

Da farko ina maka barka da dawowa gida Najeriya bayan tsawon kwana 49 da ka yi a Qasar Birtaniya, da fatan alkhairi kuma Allah yasa zakkar jiki ce. Bayan haka ya mai girma shugaban qasa abubuwa da dama sun faru a lokacin da baka nan, wasu daga vangaren al'umma wasu kuma daga varin gwamnati, nasan kana sane da hakan. Maganganu iri-iri sun ta yawo a cikin qasa musamman a dandali da shafukan yanar gizo wadanda ke alaka da rashin lafiyarka da zamanka a birnin Landan, wasu na maka fatan alkhairi a lokacin da wasu ke maka mugun baki. Bayan wannan kuma nayi nazari na gano cewar akwai abubuwan ban mamaki da suka afku wanda nake da shakku da alamar tambaya (?) akansu.

Ya mai girma shugaban qasa, a lokacin tafiyarka an sami faxuwar darajar dalar amurka da aqalla kashi 5 cikin 100, lamarin da ya sanya darajar Naira ta karu kuma hakan ya kawo rangwamen wahalar da dala ke jefa talakawan qasar nan. Wannan abu ne da ya kamata ka duba shi don gano taqamaiman dalilin da ya kawo hakan tunda dama abune dake cikin burinka ganin irin yadda gwamnatin ka ta damu da talakawanta.

An sami tsaiko na masu yiwa gwamnati varna, musamman masu  fasa bututun mai a wasu yankunan don hana ruwa gudu, wanda hakan ya nuna akwai lauje cikin nadi dake bukatar a warware nadin don gano abunda ke cikinsa. Haka zalika baa tava samun wata barazana ko togashiya ga Mai girma Muqaddashinka ba ta inda yakan kai ziyarar aiki duk inda yaso bagatatan ba tare da wani   kalubale daga wasu mutane a yankunan ba.

A vangaren samar da wutar lantarki Kuwa kodayake ya danganta da yanayi da kuma lokaci amma a kwanaki 49 an samar da wuta gwargwadon hali har jama'a na san barka ga gwamnati. Wataqila wannan ba zai rasa nasaba da dena fasa bututun mai dana makamashin da ake amfani dashi wajen samar da wutar ba, sai dai shima wannan abin a duba ne mai girma shugaban qasa.

Haka zalika a kowace gwamnati akan sami mutanen kirki masu son cigaban qasa da kuma vatagari wadanda a kullum sukewa gwamnati zagon qasa, maqarqashiya da kuma yin qafar ungulu ga cigaban qasa don hana aikata abubuwan da suka dace, to a tafiyar nan taka fa anyi walkiya wacce nake tunanin wataqila ta haska maka kowa, musamman ganin yadda wasu kafafen watsa labarai suka bankaxo wasu sirri game da wasu makusantan gwamnatinka, koda kuwa ba gaskiya bane to tabbas abin a duba ne tun yanzu don kada ya zama anyi fargar jaji a gaba.

Mai girma shugaban Qasa tafiyarka ta qara qarfafa haxin kan 'yan Najeriya musamman irin ximbin addu'o'in da aka gabatar a gareka, wanda gungun jama'a dabam-dabam suka hadu waje daya kama daga talakawa, masu mulki, masu sarauta, 'yan siyasa, 'yan kasuwa kuma abin sha'awar shine yadda mabiya addinai suka riqa gabartar da addu'o'i a masallatai da majami'u don samun lafiyarka. Wannan ya tabbatar da hadin kan jama'a  ya kuma qara dankon zumunci a tsakanin mabambamtan jama'ar qasar nan.

Mai girma shugaban qasa akwai bukatar sanya wakilci mai kyau a mafiya yawan ayyukan gwamnatinka don tabbatar da wanzuwarsu cikin gaskiya, tabbas kana da mataimaka da ma shawarta masu nagarta, musamman mai girma Mataimakin shugaban qasa wanda yayi matuqar kokari a lokacin da baka nan, wanda ya nuna cewar a shirye yake don tabbatar da cigaban kasa a kullum, akwai masu taimaka maka wadanda ka nada su don baka Shawara, tabbas wasunsu sunyi qoqari wajen wayarwa da jama'a Kai da kuma kwantar musu da hankali da lafazi mai dadi a kafafen watsa labarai a lokacin da baka nan. Tabbas ire-iren wadannan sune 'yan kishin qasa wadanda ya kamata ka riqe su don tallafawa tafiyarka ta sauya yanayin qasarnan.

A qarshe ina baka shawara da kai nazari mai zurfi akan dukan lamuran da suka afku bayan tafiyarka, ka gano musabbabin faruwar hakan don tabbatar da su. Ina maka fatan alkhairi da addu'ar Allah ya qara maka lafiya da karsashi ya kuma yi maka jagoranci wajen sauke nauyin da ke kanka cikin sauki da hikima.

MUDASSIR ya rubuto daga NTA Zariya.